Dibangkitkan bersama Kristus

*Minggu PASKAH – 09  April 2023* 

Ep. Psalm 118: 14 - 21

*Ev. Kolose   3:   1 – 4  “Raphon Jesus dipahehe= Dibangkitkan bersama  Kristus“* 

1. *Selamat PASKAH.. Selamat MERDEKA..* di-Haluaon; di-Hatuaon; di-Hamonangan-ta….!!!

2. *Hal na sangat manghalongangkon Portibion, Jesus Kristus na hehe sian na mate,* na manaluhon sorop ni Hamatean, na gabe manogu hita bahwa hamateani ndang ujung ni saluhutna, alai hangoluan salelenglelengNa do naeng sijalahanta: *"Jo hamatean, didia hamonanganmi? Jo hamatean, didia soropmi?",  Alai dosa do sorop ni hamatean, jala patik i do gogo ni dosa i. Alai mauliate ma di Debata, na pamonang hita marhitehite Tuhanta Jesus Kristus”* (1Kort15:55-57).

3. *Paulus manghajongjonghon taringot tu Parbue ni namangolu dibagasan Kristus.* Ala Jesus do na marhuaso manaluhon sorop= kuasa dosa ima hamatean i. Asa halak na mangolu dibagasan Kristus, mangolu ma dihaheheonNa, hehe manaluhon dosa jala ndang mangolu be dibagasan Dosa. Na manghangoluhon na songoni, ima na ber-Orientasi tu ngolu na di Ginjang: *”Sian Debata do anggo hamu, angka anaha; jala nunga ditaluhon hamu nasida, ai umbalga do Ibana na di bagasan hamu, asa na di bagasan portibi on”* (1Joh4:4).

Ojahan mai laho Mangonjar pangantusion ni Haporseaonta: *”man-jalahi angka na di ginjang”,* ai disi do Kristus, hundul di siamun ni Debata”.  Alani ma angka naung dipahehehe Kristus ngoluna, hehe ma sian hadosaonna, ber-orientasi ma ngoluna tu: Angka na di ginjang i, unang angka na di tano on, hataridaan ni i, ima na *“Papatarhon Haheheon ni Kristus* ” marhite na Mamparsilanghon Roha Daging= Ai nunga mate hamu. Luhut Pambahenan ni Jesus ingkon Patar do jala ia dung gabe patar sogot Kristus, hangoluanta i, disi ma gabe patar nang hamu raphon Ibana di bagasan hasangapon.

4. *Raphon Jesus dipahehe.* 

Alai molo naung mate hita rap dohot Kristus, dihaporseai rohanta, rap mangolu ma hita dohot Ibana (Rom6:8). Panindangion on naung dipahehe ngoluna dibagasan Kristus, gabe patauhon ngoluna:

1). *Manjalahi na di ginjang* 

Haradeon ni ngolu manjalahi na diginjang, diparsilangkon ma Roha Daging: *”Ai pardagingon do diparrohahon angka na mangihuthon daging i; alai Tondi do diparrohahon angka na mangihuthon Tondi i. Ai hamatean do harohaon ni daging, alai hangoluan jala hadameon do anggo harohaon ni Tondi. Hamusuon dompak Debata do harohaon ni daging; ndang olo unduk i di patik ni Debata, ai ndang tarbahensa. Alai ndang tarhalomohon Debata angka parroha daging”* (Rom8:5-8)

2). *Papatarhon Haheon ni Kristus.* 

Angka na papatarhon haheheon ni Kristus, patuduhonon ni i do ngolu na marpanindangion, namambahen Jahowa HatimbulonNa: *”Timbul situtu do siamun ni Jahowa, siamun ni Jahowa do sibahen hamonangan. Ndang tagamon mate ahu, sai na mangolu do ahu, asa hupajojor angka pambahen ni Jahowa”* (Psalm118:16-17- Epistel), amin...

Tabe sian Pangojakhonon tu Panghobasion na Imbaru di HKBP Ressort Pulo Raja.  

Jahowa na mangaramoti jala mamasumasu ngolu nang Ulaonta, amin..  Pdt. RSh,-🙏